රෝහණ විජේවීර ඒකාබද්ධ හමුදා මූලස්ථානයට ගෙන ඒමෙන් පසුව ඔහුගෙන් ප්‍රශ්න කළ එක් නිලධාරියෙකු වුණේ එවක මේජර්වරයකු වූ සරත් මුණසිංහයි. පසු කලෙක ඔහු ඒ පිළිබඳ කෙටි සටහනක් තබා තිබුණා. ඔහු ලියූ සිය චරිතාපදානයේ මෙය දැක්වෙනවා. මේජර්වරයාගේ මේ සටහන සවිස්තරාත්මකව ඉදිරිපත් කිරීමක් නොවුණත්, එය පක්ෂයට වාර්තාවී තිබූ තොරතුරුවලට අනුව බලන විට සත්‍යයක් බවයි පැවැසෙන්නේ.
‘වෙලාව පස්වරු 11.30ට පමණ වුණා. අපි ඒකාබද්ධ මෙහෙයුම් මූලස්ථානයට ළඟා වුණා. අනෙකුත් සන්නද්ධ සේවාවල නිලධාරීනුත් ඒ වෙලාවේ එතැනට ඇවිල්ලා හිටියා. රෝහණ විජේවීර හිඳගෙන සිටි සාකච්ඡා මේසයට අපව කැඳවාගෙන ගියා. මේසයේ හරියටම විජේවීර ඉදිරියෙන් වූ පුටුව මට පිරිනැමුවා. මම ඔහුත් එක්ක සාකච්ඡාව ආරම්භ කළා. ජාතික බුද්ධි කාර්යාංශයේ අධ්‍යක්ෂ ෂර්නි විජේසූරියත් ඔහුගේ දෙවැනියාත්, තවත් කිහිප දෙනකුත් එම ස්ථානයේ සිටියා. මම දිගින් දිගටම රෝහණ විජේවීරගෙන් ප්‍රශ්න කළා. මම ඔහුගෙන් ඉංග්‍රීසියෙන් ප්‍රශ්න කරන විට ඔහු සිංහලෙන් පිළිතුරු දුන්නා. මා රුසියානු බස දන්නේ දැයි ඔහු මගෙන් විමසුවා. මා එම බස නොදන්නා බව මා ඔහුට කීවා. ඔහුගේ දෙවැනි බස රුසියානු බස බව වීජේවීර මට කිව්වා. තමන්ගේ පෞද්ගලික ජීවිතයට අදාළ සියලු දේ ඔහු මට කිව්වා. මුලින්ම බණ්ඩාරවෙල සිටි බවත්, පසුව මහනුවර උලපනේට පැමිණි බවත් ඔහු කියා සිටියා. ඒත් ජවිපෙ ක්‍රියාකාරකම් පිළිබඳ තොරතුරු කියන්න ඔහු අකැමැති වුණා.
මේ සාකච්ඡාව අතරතුරේදී ඒකාබද්ධ අණදෙන නිලධාරී තම දෙවැනියත් සමග යාබද කාමරයේ වූ කාර්යාලයේ හිටියා. මැදියම් රාත්‍රිය ගෙවීයද්දී නියෝජ්‍ය ආරක්ෂක අමාත්‍ය ජෙනරල් රන්ජන් විජේරත්නත් ශාලාවට පැමිණ සාකච්ඡා මේසයේ ප්‍රධාන ආසනයේ අසුන්ගත්තා. විජේවීරගෙන් ඔහු ප්‍රශ්න කිහිපයක් ඇසුවත් විජේවීර ඊට පිළිතුරු දුන්නේ නැහැ. ජෙනරල් විජේරත්න ඒකාබද්ධ මෙහෙයුම් අණදෙන නිලධාරියාගේ කාර්යාලයට ගියා. අපි අපේ සාකච්ඡාව ඊට පස්සේ දිගටම කරගෙන ගියා.
අපි කතාකරන අතරතුර තේ කෝප්ප කිහිපයක්ම හිස් කළා. ත්‍රස්ත ක්‍රියාවලින් වැළකී ඉන්න කියලා තමන්ගේ පක්ෂ සාමාජිකයන්ට උපදෙස් දෙන්න කියලා මම විජේවීරගෙන් ඉල්ලා සිටියා. තර්ජනය කොට කියා සිටීමෙන් පසුව ඔහු ඊට එකඟ වුණා. ඔහු කී දේ පටිගත කරගත් අපි නිසල කැමරාවකින් පින්තූර කිහිපයකුත් ගත්තා. ටික වේලාවකින් පසු අප හොඳින් දන්නා පොලිස් අධිකාරිවරයෙක් ඒකාබද්ධ මෙහෙයුම් කාර්යාලයට ආවා. ඇතුළට පැමිණි නිලධාරියා රෝහණ විජේවීරගේ කොණ්ඩය පිටුපසට අල්ලාගෙන ඔහුගේ කම්මුලට දෙවරක් තට්ටු කළා. පසුපස හැරී බැලූ විජේවීර ‘තමුන්නාන්සේ වගේ කෙනෙක් වෙන්න ඇති කියලා මම හිතුවා’ යනුවෙන් පැවැසුවා. පොලිස් නිලධාරියා ඒකාබද්ධ මෙහෙයුම් ප්‍රධානී හා ඇමැතිවරයා සමග සාකච්ඡාවට ඉන් පසුව එක්වුණා. අපි අපගේ සාකච්ඡාව දිගටම කරගෙන ගියා.
විජේවීර රසවත් කතා කීපයක්ම කිව්වා. දිනක් ජවිපෙ ක්‍රියාකාරීන් පිරිසක් නිමල් කිත්සිරි අත්තනායකගේ ඒ කියන්නේ රෝහණ විජේවීරගේ උලපනේ නිවෙසට ඇවිල්ලා තියෙනවා. තම ව්‍යාපාරය සඳහා ඔවුන් මුදල් ඉල්ලලා තියෙනවා. විජේවීර එසැණින්ම ඔවුන්ට රුපියල් 100ක් දෙමින් ප්‍රතිචාර දක්වලා තිබුණා. ‘තරුණ ක්‍රියාකාරීන් තමන්ගේ නායකයව හඳුනාගත්තෙත් නෑ…’ කියලා විජේවීර හොඳටම හිනාවුණා.
1989 නොවැම්බර් 13 වැනිදා පාන්දර 3.45ට පමණ ප්‍රශ්න කිරීම අවසන් කරන්න කියලා මට නියෝග ලැබුණා. ඊට පස්සේ රෝහණ විජේවීර පහළ තට්ටුවට රැගෙන එන්න කියලා දැනුම් දුන්නා. අපි එකිනෙකාට ළංව පහළට බැස්සා. විජේවීර මගේ අත අල්ලගෙන මෙහෙම කිව්වා.
‘අන්තිම මොහොතේ ඔබතුමා වගේ කෙනෙක් හමුවීම ගැන මට ගොඩක් සතුටුයි. මම වැඩි දවසක් ජීවත් වෙන එකක් නැහැ. මගේ පණිවුඩය කරුණාකරලා මගේ බිරිඳට දෙන්න.’
විජේවීරගේ පණිවුඩයේ වැදගත් කරුණු 5ක් අඩංගු වුණා. ඒවා සියල්ල ඔහුගේ පවුලට සම්බන්ධ අතිපෞද්ගලික කාරණා. මොහොතකට පස්සේ විජේවීරගේ දෑස් වසා බැඳ කොළ පාට පැජරෝ ජීප් රථයේ පසුපස ආසනයේ ඔහුව ඉන්දෙව්වා. දෙදෙනෙක් විජේවීරගේ දෙපස අසුන්වල හිඳගත්තා. අනෙක් අය ගොඩවුණේ ජීප් රථයේ පිටුපසම තිබුණු ආසනවලට. ඒ වෙලාවේම වගේ ජ්‍යෙෂ්ඨ පොලිස් නිලධාරියෙක් ආවා වාහනය අසලට. ඔවුන් හා එක්වෙන්න ඔහු කළ ඇරයුම මම විනීත ලෙස ප්‍රතික්ෂේප කළා. පැජරෝ රථය ඉදිරියට ගියා. මම කර්නල් ලයනල් බලගල්ලත් එක්ක ඒකාබද්ධ මෙහෙයුම් මූලස්ථාන ගොඩනැගිල්ලට පිවිසෙන ස්ථානයේ සිටගෙන සිටියා.’ මේ සරත් මුණසිංහ කියූ කතාව.
මොඩ්ල් ෆාම් පාරේ ගොල්ෆ් පිටියට රෝහණ විජේවීර සහෝදරයා ගෙනගොස් ඝාතන සැලසුම් ක්‍රියාත්මක කරන ලද්දේ ඉන් අනතුරුවයි.
Srilankantv Plus යූටියුබ් නාලිකාවෙනි