"ඇයි අම්මේ මට මෙහෙම කළේ…" මවගේ දෙවැනි සැමියා දියණියගේ හුස්ම උඳුරා ගනී... අකරවිට කැළඹූ ඝාතනයේ සුල මුල හෙළිවෙයි

ගම්පහ පොලිස් වසමේ අකරවිට ප්‍රදේශයේ පදිංචිකාරියක විසින් තම වයස අවුරුදු 14ක්වූ දියණිය අතුරුදහන්ව ඇති බවට ගම්පහ පොලිස් ස්ථානයට පසුගිය 05 වැනිදා සිදු කරන ලද පැමිණිල්ලකට අනුව විමර්ශනයක් ආරම්භ කර තිබුණා.

පැමිණිලිකාර කාන්තාව තම දෙවන විවාහයේ ස්වාමිපුරුෂයා සහ දියණිය සමග මාකෙවිට ප්‍රදේශයේ ඉදි කරමින් පවතින වෙනත් අයෙකුට අයත් තෙමහල් නිවසක තාවකාලිකව පදිංචිව සිටින අතර, ඔහු පෙදරේරුවෙකු වශයෙන්ද, පැමිණිලිකාරිය ඒකල ප්‍රදේශයේ පුද්ගලික අංශයේද රැකියාවක් සිදු කරනු ලබයි.

පසුගිය 02 වැනිදා තම සැමියා සහ දියණිය නිවසේ සිටියදී කාන්තාව උදෑසන රැකියාවකට ගොස් රාත්‍රියේ නැවත නිවසට පැමිණ දියණිය නිවසේ නොසිටීම පිළිබඳ තම සැමියාගෙන් විමසීම් සිදු කර තිබෙනවා.

එහිදී ඔහු විසින් දියණිය යහලුවෙකුගේ පවුලේ සාමාජිකයින් සමග විනෝද චාරිකාවක් ගොස් ඇති බවටත් එදින නොපැමිණෙන බව හා පසුදින පැමිණෙන බවටයි බිරිඳව දැනුවත් කර ඇත්තේ.

දියණිය 05 වැනිදා දක්වාම නිවසට නොපැමිණීම හේතුවෙන් දෙදෙනා අරවුල් ඇති කරගෙන ඇති බවත්, පසුව පොලිස් ස්ථානය වෙත පැමිණිල්ලක් ඉදිරිපත් කර ඇති අතර තම සැමියා දැරියගේ අතුරුදහන්වීම සම්බන්ධයෙන් සැක බවත්, ප්‍රකාශ කර තිබෙනවා.

සිද්ධිය සම්බන්ධව විමර්ශනය සිදුකළ පොලිස් නිලධාරීන් විසින් වයස අවුරුදු 42ක් වන පැමිණිලිකාරියගේ ස්වාමි පුරුෂයා අත්අඩංගුවට ගෙන වැඩිදුර විමර්ශන සිදු කරයි.

පසුගිය 02 වැනිදා බිරිඳ විසින් ඇයට අයත් සැමියා විසින් උකසට තබන ලද රන් මාලයක් නිදහස් කර ගැනීම සඳහා දියණියට මුදල් ලබා දී පියා සමග ගොස් එම රන් මාලය නිදහස් කර ගන්නා ලෙසට ප්‍රකාශ කර බිරිඳ සිය රැකියා ස්ථානයට ගොස් තිබෙනවා.

මොහු තදින් මත්ද්‍රව්‍ය සඳහා ඇබ්බැහි වූවෙකු බැවින් දියණියට රන් භාණ්ඩ ලබා ගැනීම සඳහා ලබා දී තිබූ මුදල් දියණියගෙන් ඉල්ලා ඇති අතර දියණිය විසින් ප්‍රතික්ෂේප කිරීම හේතුවෙන් ඇයට පහරදී මුදල් පැහැරගෙනයි නිවසින් පිටව ගොස් ඇත්තේ.

පසුව නිවසට පැමිණි ඔහු දියණිය පහරකෑ ස්ථානයේම වැටී සිටි නිසා ඇය පරීක්ෂා කිරීමේදී ඇය මිය ගොස් සිටි බැවින් දියණියගේ මෘත ශරීරය ඉටි කවරයක බහා ඉදිකරමින් පවතින නිවසේ වැසිකිලි වලකට දමා වසා දැමීමට කටයුතු කර ඇති බව විමර්ශන වලදී අනාවරණය වී තිබුණා.

අනාවරණය කර ගත් තොරතුරු මත ගම්පහ මහේස්ත්‍රාත් අධිකරණයේ නියෝග පරිදි වැසිකිලි වලේ වල දමා තිබූ දියණියගේ සිරුර ගොඩගෙන පශ්චාත් මරණ පරීක්ෂණය සඳහා ගම්පහ රෝහලේ මෘත ශරීරාගාරයේ තැන්පත් කර තිබෙනවා.

අත්අඩංගුවට ගත් සැකකරු පසුගිය (06) ගම්පහ මහේස්ත්‍රාත් අධිකරණයට ඉදිරිපත් කිරීමෙන් පසු 16 වැනිදා දක්වා රක්ෂිත බන්ධනාගාර ගත කර ඇති අතර, සිද්ධිය සම්බන්ධයෙන් ගම්පහ පොලිසිය වැඩිදුර විමර්ශන සිදු කරනු ලබනවා.